እኚህ ሰው ማናቸው? – ፯

ከአዘጋጆቹ፤ባለፈው ሳምንት “እኚህ ሰው ማናቸው? – ፮” በሚል ለቀረበው ምላሽ በድረገጻችን በመላክና በፌስቡክ ላይ በመለጠፍ የተሳተፋችሁትን በሙሉ እናመሰግናለን፡፡ በተለይ በግጥም ምላሻችሁን ለሰጣችሁ በሙሉ ከፍያለ ምስጋናችንን እናቀርባለን፡፡ በተለይ በዚህኛው በርካታዎች በመሳተፋችሁና በግጥም ምላሽ በመስጠት ዝግጅቱን ላሳመራችሁ ሁሉ በድጋሚ ምስጋናችን ይድረሳችሁ – ቀጥሉበት:: የቅንብሩ አዘጋጅ ወለላዬ በቁጥር ስድስት ለቀረበው ጥያቄ ምላሻቸውን በሚከተለው መልኩ በግጥም አስፍረዋል፡፡

መልስ

በአፄ ሚኒሊክ – የአገዛዝ ዘመን

ኤርትራ በሚገኝ – የስዊድን ሚሽን

በኋላም ውጪ ሀገር – ብዙ የተማሩ

በዕውቀታቸውም – ለሀገር የሰሩ

በሹመት የቆዩ – ሆነው ነጋድራስ

ታሪክ ያረሳቸው – እስከዛሬ ድረስ

ገብረህይወት ባይከዳኝ – በሚል የጻፋችሁ

ስህተት የለውም – ልክ ነው መልሳችሁ።

ለዚህ ሳምንት “እኚህ ሰው ማናቸው? – ፯” ወለላዬ የሚከተለውን አቅርበዋል፡፡ ምላሻችሁን በግጥም በመመለስ ለዝግጅቱ ውበት እንድትሰጡ ለማደፋፈር እንወዳለን፡፡ በብዙ ፍለጋ የተገኘው ፎቶ ይህ ወለላዬ የላኩት ብቻ ነው:: ምናልባት መልሱን ስንሰጥ የተሻለ ፎቶ ያላችሁ ትልኩልንና እናሻሽለዋለን:: የዛሬ ሳምንት መልሱን በግጥም እናቀርባለን፡፡

መቼም አጋጣሚ – ሰውን ያስታውሳል

ላገሩ የሰራ – ምን ግዜም ይወሳል።

ድምጻቸው ሲሰማ – እኝህ የሚታዩት

ብዙ ሰው ነበረ – የሚያዝን ሚደሰት

አቤት አነጋገር – ያቀራረበ ለዛ

ዳሩ ምን ይሆናል – አለፉ እንደዋዛ

ሰላሳ አራት ዓመት – ምድሪቷን ከራቁ

እኝህ ሰው ማናቸው? – በሉ ተጠየቁ።