የስልጣን ተስፈኛ ፖለቲከኞች

የኢህአዴግ የቁርጥ ቀን ልጅ ልደቱ አያሌውና ፓርቲው ኢዴፓ ባዲስ ትርፍ የፓርላማ መቀመጫ ፍለጋ ሰሞኑን ከእንቅልፋቸው መንቃታቸውን ሰምቼ ትንሽ ተገረምኩ። በውል ያልተደነቅሁበት ምክንያት ኢዴፓንና ሌሎች በኢህአዴግ-ወለድ የተቃዋሚ ፓርቲዎች ም/ቤት ውስጥ የታጨቁ የስልጣን ተስፈኞች እንጂ ፖለቲካ የሚያውቁ ቁርጠኛ ተቃዋሚዎች ናቸው ብዬ ስለማላውቅ ነው። ደግነቱ ደግሞ ነገሩ እውነት መሆኑ ነው። እነዚህ ኢህአዴግ በልካቸው በሰራላቸው ጉረኖ ታሽገው በኢትዮጵያ ህዝብ መስዋእትነት ስልጣን ለመቀላወጥ በተስፋ የሚያደቡት ኢዴፓና አጃቢዎቹ ሰሞኑን የኢህአዴግ ዙፋን ሲነቃነቅ በፈጠረው የፖለቲካ ስንጥቅ ለመሰካት በጠቅላይ ሚንስትሩ እግር ስር ወድቀው ትራፊ ወንበር እንዲረጥቧቸው ልመና መጀመራቸውን ሰምቼ አፈርኩባቸው።

የኢዴፓ ሊቀመንበር ዶክተር ጫኔ ከበደ አርብ መጋቢት 16 ቀን 2008 ዓም ለአሜሪካ ድምፅ ያማርኛው አገልግሎት በሰጡት ቃለምምልስ ተቃዋሚዎች በፓርላማ የውክልና ወንበር እንዲኖራቸው ለማድረግ ተስፋ እንደተሰጣቸው ያለሀፍረት ሲናገሩ ተደምጠዋል። እስቲ ማን ይሙት በዚህ ወቅት፣ ከአንድ የተቃዋሚ ፓርቲ የሚጠበቅ ይህ ነበር? ፊደል ያልቆጠረው ምስኪኑ የኢትዮጵያ ገበሬ ለዴሞክራሲና ፍትህ የድሃ ደሙን እያፈሰሰ ባለበት በዚህ ወሳን ወቅት የኛ ዶክተር ፖለቲከኞች ሊሞት በሚያጣጥር አምባገነን እግር ስር ወድቀው የፓርላማ ወንበር ይለምናሉ። መጥኔ አቦ! እንዴት ያለ ህሊና ቢኖራቸው ነው ጃል? በህዝብ ደም አሮጌ የስልጣን ወንበር መመኘት።

ክቡር የሆነውን የወገን ደም ማርከስ አይሆንም? እንደወጉ ቁርጠኛ ተቃዋሚ መሆን ባይሳካላቸውና ተፈጥሯቸው ባይፈቅድላቸው እንኳን ገላጋይ ሽማግሌ ለመሆን ቢጥሩ ምን ነበረበት? ህዝብ ለፍትህ ሲጮኽ ብትት እንኳን ሳይሉ የወንበር እርጥባን ሹክሹክታ እንዴት በአንድ ጊዜ አባነናቸው? ጉድ ነውመቼም!

ለነገሩ ይህ ፓርቲና አጋሮቹ ምን ጊዜም ኢህአዴግ ጭንቅ በገጠመው ጊዜ ሁሉ ደራሽና የቁርጥ ቀን አገልጋዮች በመሆናቸው ታሪካቸውን ለሚያውቅ ድርጊታቸው የሚያስገርመው አይሆንም። የቅንጅት ዘመን ሚናቸውን ያስታውሷል። ያኔም ቢሆን ሀገር የከዱት በስልጣን ጥምና ስግብግብ ፍላጎታቸው ነበር። ዛሬም ያው ልማደኛ የስልጣን አራራቸው ተነሳና የህዝብ አስከሬን ላይ ቆመው ስልጣን ይለምኑ ጀመር። አቤት ክፉ ቀን ስንት ክፉ ነገር ያሳያል? ይህን ከመሰሉ አርተፊሻል ተቃዋሚዎች ኢህአዴግ በስንት ጣዕሙ ጃል!

ዛሬ ኢትዮጵያ የምትገኝበት ሁኔታ ልዩ መፍትሄ የሚሻ ነው። አሁን ስልጣንና ወንበር በስሌት የምንከፋፈልበት ጊዜ አይደለም። አሁን ይህች ውብ ሀገር ከገጠማት የታሪክ ፈተና ለማውጣት ሁላችንም (ምናልባትኢህአዴግን ጨምሮ) ሌት ተቀን የምንጨነቅበት ወቅት ነው። ዛሬ ነባር የግልና የቡድን ጥቅማችንን እያሰላን ሆዳችን የሚጮኽበት ጊዜ ሳይሆን በምጥ ላይ የምተገኘውን ሀገራችንን ካንቺ በፊት ያርገኝ የምንልበት ፈታኝ ወቅት ነው። እናም ኢደዓዊያን፣ እባካችሁ ህሊና ግዙ። ይሉኝታም ያስፈልጋል። ሀገር ሰላም ከሆነ ሌት ተቀን የሚያቃዣችሁ የስልጣን ሱስ የሚረካበት ጊዜ ሊመጣ ይችላል። ሀገር ከወደቀች ግን ከነቅዠታችሁ ትቀበራላችሁና አስቡበት። ቢቻል የህዝብን ጩኸት ችላ ብላችሁ በጓሮ በር ስልጣን ለመቀላወጥ ያደረጋችሁት ሙከራ አሳፋሪ ነውና በይፋ ይቅርታ ጠይቁ። ይህ ጨዋነት የማይሆንላችሁ ከሆነ ደግሞ ለገዛ እናታችሁ ቀብር መቆፈር የጀመራችሁትን ቁፋሮ አቁሙ። ኢህአዴግም ይታዘባችኋል። ይህ ካልሆነ ዛሬ ለኢትዮጵያ በቆፈራችሁት ጉድጓድ እናንተው ትገቡበታላችሁ። በጭንቅ ቀን ሀገሩን የከዳ ዋጋው ከዚህ ያነሰ ሊሆን አይችልም። ልቦና ይስጣችሁ! አሜን።

“ጎልጉል፡ የድረገጽ ጋዜጣ የሕዝብ” እንደመሆኑ በ“የኔ ሃሳብ (Opinion)” ዓምድ ሥር የድርጅቶችና የማንኛውም ግለሰብ ነጻ ሃሳብ የሚስተናገድ ሲሆን ከአንባቢያን የሚላኩልን ጽሁፎች በጋዜጣው የአርትዖት (ኤዲቶሪያል) መመሪያ መሠረት ያለ መድልዖ በዚህ ዓምድ ሥር ይታተማሉ። ይህ በጎልጉል የድረገጽ ጋዜጣ በ“የኔ ሃሳብ (Opinion)” ዓምድ የታተመ ጽሁፍ የጎልጉል የድረገጽ ጋዜጣ^® አቋም ሳይሆን የጸሃፊው ነው።